По инициативе библиотекаря Лаверновой Р.Е., при поддержке наслежной администрации и школы организована и проведена первая республиканская НПК "Малгаровские чтения". Приняли участие: с Момского, Кобяйского, Мегино - Кангаласского, Амгинского, Сунтарского, В.Вилюйского, Вилюйского, Ньурбинского, города Якутска, и из 12ти наслегов Олекминского района, всего 111 участников.

Үтүө күнүнэн, күндү биир дойдулаахтарым!

Бэҕэһээ, тохсунньу 23 күнүгэр, эрдэттэн былааннаммыт, бука бары үөрэммит, ытыктыыр, куруук саныыр учууталбыт Садот Моисеевич Малгаров төрөөбүтэ 90 сааһыгар аналлаах Бастакы "Малгаровскай ааҕыы" ситиһиилээхтик ыытылынна.

Киһи эрэ санаата күүрүөх олус элбэх оҕо да, улахан да дьон кытынна.

Ааҕыы үс араас форматынан ыытыллан дьон көҕө сүрдээх.

Садот Моисеевич төрөөбүт Мэҥэ Хаҥалаһыттан, аан бастаан үлэтин саҕалаабыт Муоматыттан, ол эрэ буолуо дуо?! Кэбээйиттэн, Сунтаартан, Ньурбаттан, Үө/Бүлүүттэн, Бүлүүттэн, Амматтан, Дьокуускай куораттан уонна бэйэбит оройуоммут 12 нэһилиэгиттэн барыта 111 кыттааччы күөн көрүстэ. Онтон 40-на тэйиччиттэн (дистанционно) кытынна. Онон үлэни көрүү икки күн ыытылынна. Кыайыылаахтар туһунан өссө эбии суруллуоҕа. Билигин тэрээһин туһунан киэн тутта суруйабын.

Тэрээһин хара саҕаланыаҕыттан ким да туора турбакка, бука бары үөрүүнэн сөбүлэһиилэрэ бу биһиги учууталбытыгар Садот Моисеевичка махталлара улаханын туоһута диэн өйдөбүл.

Олохтоох дьаһалта, оскуола, библиотека бука бары көмөлөөн олус таһаарыылаах тэрээһин ааста.

Дьүүллүүр сүбэҕэ үлэлээҥ уонна бирииһинэн спонсордааҥ диэн көрдөһүүнү ылынан кэлбит дьоммут: Корнилова Ю. А., Корнилова ТЛ., Корнилова ОИ., Данилов РЛ., Яковлев ВС.,  Узорова НА, Узорова ТН., Чердонов ДВ., Уфимцева АА., Максимова АМ., Торговкина ПП., Яковлева ЛЛ., Баишева ОВ. Эһиэхэ тэрийээччилэр уонна тумус туттар учууталбыт Валентина Спиридоновна ааттарыттан махталбын тириэрдэбин!

Оскуолабыт коллектива бу бары тутуспутунан, үөрүйэхтэринэн саба түһэн барытын сыа - сым курдук тутан көхтөөхтүк үлэлээтилэр, бука барыгытыгар махтал!

Эдэрбин диэн көрөн турбакка, барытыгар бэрт холкутук техническэй өттүн быһаарбыт эдэр эрчимнээх үлэһиккэ, бэйэбит оҕобутугар Никита Валерьевич Максимовка анал махталбын тиэрдэбин! Куруук бу курдук үлэ үөһүгэр сырыт, маладьыас, махтал!

Электронканан кэлбит үлэлэри, заявкалары түүннэри, күнүстэри Виктория Викторовнаҕа ыытарбын Никита Валерьевичтыын сааһылаан, өрө-таҥнары телефоннаһан кыттааччы списогын чопчулаабыт, ааҕыы аһыллыытын сценарийын суруйан, тэрийэн ыыппыт Кузьмина ВВ анал махтал!

Кэлбити үөрэ көрсөр, арыаллыыр, бу да сырыыга кэлбит дьону бэркэ көрсөрү көҕүлээбит Полина Еремеевнаҕа тус махтал!

Диплому, сертификаты толоруу, суруйуу бу эмиэ олус үлэлээх, маны аккаастаммакка, дьиэтигэр ылан толорбут Аида Михайловнаҕа барҕа махтал!

Аһы-үөлү, сырдыгы, ырааһы көҕүлүүр Светлана Егоровнаҕа уонна кининэн сирэйдэнэн оскуола үлэһиттэригэр бука барыларыгар куруук нэһилиэккэ ыытыллар тэрээһини өйүүр дьоммутугар муҥура суох махталы тириэрдэбит.

Тэрээһин табыллара дьон түмсүүтүттэн, бары бииргэ үлэлииртэн тахсар. Өссө даҕаны нэһилиэкпит, нэһилиэкпит дьонун-сэргэтин аатын үйэтитэр туһугар үлэлиэҕиҥ - хамсыаҕыҥ!

Күндү дьонум, бука бары доруобай буолуҥ, үлэҕит -хамнаскыт тахсыылаах буоллун!